खोप लगाएपछि हल्का रुघाखोकी लागेको थियो । बिसन्चो महशुस भएपछि ३५ वर्षीया कल्पना बुढाले शुक्रबार साँझ खाना पनि खाइनन् । रात परेपछि उनी आफ्ना दुई छोरा र एक भदैसहित सुत्ने कोठाभित्र पसिन् ।
जाडो महशुस गरेकी उनले कोठामा तातो होस् भनेर झ्यालढोका नै बन्द गरिन् । अनि तसलामा कोइला बालेर सुतिन् । तर शुक्रबार राती एउटै कोठामा सुतेका चारैजना फेरि ब्यूँझि नै पाएनन् ।वीरेन्द्रनगर–१० बुदबुदीमा रहेको आफ्नै घरमा सुतेका कल्पना, उनका छोराहरु निरज र चिरिञ्जीवी तथा भदा सोमराज शनिबार बेलुकी मृत भेटिए । घरमा कल्पनाका ससुरा वीरबहादुर विसी पनि थिए ।
तर उनी शनिबार बिहानै घरबाट आफ्नो काममा निस्किए । बेलुकी घर आउँदा वीरबहादुरले आफ्ना नातीहरुलाई देखेनन् । घर पनि सुनसान देखे ।नातीहरु नदेखेपछि उनी हतारिँदै बुहारी कल्पना सुत्ने कोठातर्फ गए । तर कोठाको ढोका नै खुलेन । झ्याल पनि बन्द भएपछि उनले आत्तिदै छिमेकीहरु बोलाए । त्यसपछि स्थानीयले घटनाबारे प्रहरीलाई खबर गरे ।शुक्रबार रातीको घटना भए पनि आफूहरुले शनिबार बेलुकी मात्र खबर पाएको जिल्ला प्रहरी कार्यालय सुर्खेतका एसपी पदमबहादुर विस्टले बताए ।
प्रहरीले ढोका फोडेर हेर्दा कोठामा रहेको खाटमा चारैजना मृत अवस्थामा भेटिएका हुन् । ‘खाटमुनी तसलामा कोइला बालेको भेटियो,’ एसपी विस्टले भने,‘जाडोमा कोठा तताउन कोइला बालेर सुतेका रहेछन्, झ्यालढोका सबै बन्द गरेर सुतेको पाइयो । यसकारण पनि उनीहरुको निसासिएर नै मृत्यु भएको हाम्रो प्रारम्भिक अनुमान छ, तर पनि शवको पोष्टमार्टम रिपोर्ट आएपछि बाँकी विषय खुल्नसक्छ ।’ शवको पोष्टमार्टम आइतबार प्रदेश अस्पताल सुर्खेतमा गरिएको छ ।
मृतक कल्पनाका श्रीमान् कृष्णबहादुर विसी जाजरकोटको शिवालय गाउँपालिकामा रहेको स्वास्थ्य शाखाका प्रमुख हुन् । उनी शनिबार रातीमात्र सुर्खेत आएका कारण आइतबार शवको पोष्टमार्टमा गरिएको प्रहरीले जनाएको छ ।मृतक कल्पनाका ससुरा वीरबहादुरका अनुसार मृतक निरज कक्षा ४, चिरञ्जीवी कक्षा २ र सोमराज कक्षा १ मा अध्ययन गर्थे । उनीहरु स्थानीय डाइनामिक बोर्डिङ स्कुलमा पढ्थे ।
बुहारीले बिसन्चो मानेकी थिइन्, तसलामा कोइला लगेर कोठामा बालेका थिए,’ वीरबहादुरले भने,‘बुहारी सधैं बिहान ढिला उठ्ने भएकाले मैले पनि वास्ता गरिनँ, सुतेकै होलान् भनेर बिहानै निस्किएँ । बेलुकी घर आउँदा नातीहरुलाई वरपर नदेखेपछि खोजी गरेँ, तर उनीहरुलाई पापी दैवले लगिसकेको रहेछ ।’